നിവിന് പോളിക്ക് ജാഡ കൂടുതലാണെന്നും അതുകൊണ്ട് ലാല്ജോസ് പുതിയ സിനിമയില് നിന്നും നിവിന് പോളിയെ മാറ്റി മറ്റൊരു നായകനെ അന്വേഷിക്കുകയാണെന്ന സോഷ്യല്മീഡിയ പ്രചരണങ്ങള്ക്കും വാര്ത്തകള്ക്കും മറുപടിയുമായി സംവിധായകന് ലാല് ജോസ്.
താനും ഇത്തരമൊരു വാര്ത്ത കണ്ടിരുന്നു എന്നാല് ഇതിന്യാഥാര്ഥ്യവുമായി ഒരു ബന്ധവുമില്ലെന്നാണ് സംവിധായകന് പറയുന്നത്.തന്റെ ഒരു സിനിമയില് നായകനായി നിവിനെ ക്ഷണിച്ചിരുന്നു. ഞങ്ങള് ഒരുമിച്ചിരുന്നു സിനിമയെക്കുറിച്ചും കഥയെക്കുറിച്ചും സംസാരിച്ചു. എന്നാല് കഥയ്ക്ക് പൂര്ണത കൈവന്നിരുന്നില്ല. അതിനാല് തന്നെ ചില മാറ്റങ്ങള് വേണമെന്ന് ഞങ്ങള്ക്കിരുവര്ക്കും തോന്നി. അതിനാല് തല്ക്കാലം ആ സിനിമ ചെയ്യേണ്ട എന്നു തീരുമാനിക്കുകയായിരുന്നു. പക്ഷേ ഭാവിയില് ഇതു യാഥാര്ഥ്യമായേക്കാമെന്നും ലാല് ജോസ് പറഞ്ഞു.
കഥയില് കുറച്ചു തിരുത്തലുകള് നടത്തേണ്ടതുണ്ട്, എങ്കിലേ അത് പ്രേക്ഷകര് സ്വീകരിക്കുകയുള്ളൂവെന്നും അദ്ദേഹം കൂട്ടിച്ചേര്ത്തു.ഈ മാധ്യമങ്ങള് പറയുന്നതുപോലെ ഞാനും നിവിനും തമ്മില് യാതൊരു പ്രശ്‌നങ്ങളുമില്ല. നിവിന്പോളി നായകനായെത്തുന്ന ആക്ഷന് ഹീറോ ബിജുവും അതുപോലെ ജേക്കബിന്റെ സ്വര്ഗരാജ്യവുമൊക്കെ വിതരണത്തിനെടുത്തിരിക്കുന്നത് എന്റെ പ്രൊഡക്ഷന് കമ്പനിയാണ്. ഞങ്ങള് തമ്മില് എന്തെങ്കിലും പ്രശ്‌നമുണ്ടെങ്കില് ഇതു സംഭവിക്കുമോ? എന്ന ചോദ്യവും അദ്ദേഹം ഉന്നയിച്ചു.അതേസമയം നടന് ജോജു എന്നോട് ഗുരുനിന്ദ കാണിച്ചു എന്നു പറഞ്ഞ് പുതിയ കഥ ഇറങ്ങിയിട്ടുണ്ട്, ഇപ്പോള് എനിക്ക് ഒരു സുഹൃത്ത് എനിക്ക് ഈ വാര്ത്ത വാട്‌സാപ്പ് ചെയ്തു തന്നതേ ഉള്ളൂ. എന്റെ രണ്ടു മൂന്നു പടത്തില് അവന് അഭിനയിച്ചുട്ടുണ്ടെന്നേ ഉള്ളൂ.ജോജുവിന്റെ ഗുരുവല്ല ഞാന്. പിന്നെ എങ്ങനെയാണ് അദ്ദേഹം എന്നോട് ഗുരു നിന്ദ കാണിക്കുന്നത് എന്നും ലാല് ജോസ് കൂട്ടിച്ചേര്ത്തു.
ഇത്തരം നുണക്കഥകള് പടച്ചുവിടുന്നവരോട് വലിയ നമോവാകം എന്ന് പറഞ്ഞ ലാല് ജോസ് അന്നന്നത്തെ അപ്പത്തിനായി അവര് ബുദ്ധിമുട്ടി വാര്ത്തകള് ഉണ്ടാക്കുമ്പോള് എത്രപേര്ക്കാണ് ഇത് കൊണ്ട് മാനിസീക ബുദ്ധിമുട്ടുകള് ഉണ്ടാവുന്നതെന്നും എത്രയെത്ര ബന്ധങ്ങള് ഇതിലൂടെ തകരുന്നുണ്ടെന്നും അവര് മനസിലാക്കുന്നില്ലെന്നും നാളെ വാര്ത്തകള്ക്കു വേണ്ടി ഇവര് സ്വന്തം വീട്ടുകാരുടെ നേര്ക്ക് തിരിയാതിരുന്നാല് മതിയെന്നും കൂട്ടിച്ചേര്ത്തു. മലയാളത്തിലെ പ്രമുഖ മാധ്യമത്തിന് നല്കിയ അഭിമുഖത്തിലാണ് ലാല് ജോസ് ഇക്കാര്യങ്ങള് വെളിപ്പെടുത്തിയത്.
